Las Asturias de Santander

Las Asturias de Santander

La ciudá de Sanander ye dende 1835 la capital d’una provincia nueva que se formó alministrativemente sobre l’anterior provincia d’Asturies de Santiyana, y formando parte d’Asturies dende los mesmos oríxenes d’Asturia como Reinu. Si bien esisten pequenes ruines d’época romana atopaes nel principal colláu que domina la badía, el Somorrostru, na antigüedá sólo foi un puertu natural como tantos otros de la cornisa atlántica ensin población. El principal orixe de la villa de Sanander como centru de población ye relixosu y data de tiempos del Reinu d’Asturies cuando Alfonsu II, dientro de la so política de repueblación interior eclesiástica, ordena la fundación nesti colláu d’una abadía sobre una hermita anterior onde taben veneraes les tiestes de los santos mártires Medé y Celedoniu, trayíes de Calagorra llueu l’avance musulmán. Alfonsu II d’Asturies dominaba tola costa atlántica del norte hasta Guipuzcua. Llueu Alfonsu III el Grande edifica un castiellu a la vera y una muria pa protexer l’abadía y el puertu de los ataques viquingos. Dende entós el governador del pequenu aniciu de población va ser l’abá de la Colexata de Sant Emeterii y Celedonii. El monasteriu de Santemeder foi asina un esllabón más nes pelegrinaciones a Santiagu que continuaben escontra la Colexata de Santiyana pa venerar la tumba de Santa Iyana. Santiyana convirtióse col tiempu nun de los monasterios más importantes d’Asturies y anque les tierres ente los ríos Eo y Miera pertenecen dende l’entamu al Obispáu d’Uviéu, Santiyana algamó un gran poder territorial propiu al que pertenecía el territoriu abacial de Santemeder. Sanchu III de Pamplona conquista nel sieglu XI tol territoriu hasta’l ríu Miera, y la badía de Santemeder, onde desemboca esti ríu, foi durante munchu tiempu la frontera ente Les Asturies, que pertenecíen al nuevu reinu de Castiella y Lleón y la Tresmiera que dexó de ser asturiana pa pasar al Reinu de Pamplona y al obispáu de Náxera. Nel sieglu XII, resurde l’espansionismu castiellanu cola creación del obispáu de Burgos que consigue quita-y al d’Uviéu tol territoriu d’Asturies de Santiyana, al que pertenez Santemeder, con gran oposición y rechazu por parte del Obispáu d’Uviéu que nun acepta la sentencia d’esgayamientu conservando’l territoriu de Cartes. Esta dixebra fai que Castiella conquiste más fastera marítima a Pamplona y que s’anexione depués Asturies de Santiyana p’asegurase unos puertos marítimos que-y dea surtida al so principal comerciu: la esportación de la llana. Cuando Castiella y Lleón se separen Asturies d’Uviéu y Llébana queden englobaes nel Reinu de Lleón mentantu Asturies de Santiyana queda dientro del de Castiella como merindá alministrativa. La pobla de Santu Medé recibe’l fueru de Sanfacún en 1187 por gracia d’Alfonsu VIII, como otres puebles eclesiástiques d’Asturies, concediendo al abá del monasteriu el señoríu o governanza de la villa y alfoz y les rentes d’otres ilesies como Miera, San Llorente, Cayón, Llerana y Toranzu. Los pechos más importantes cobrábense por entrar mercancíes nel puertu. De 1248 daten los escudos de Sanander y Avilés remembrando la conquista de Sevilla gracies a la fazaña de los asturianos rompiendo les cadenes del ríu Guadalquivir colos barcos. La esportación de la llana castiellana yera la principal función del puertu de Sanander. La marina de Castiella tenía dos almirantazgos, al del norte, con sede en Burgos, pertenecíen los navíos de Guipuzcua, Bizcaya, les Cuatro Villes, Asturies d’Uviéu y Santiyana y Galicia. Gracies a los asturianos d’Uviéu y Santiyana, Alfonsu XI llogró una victoria decisiva sobre los moros na Batalla del Salado en Tarifa y en 1349 conquistando Xibraltar. Henrique II decide convertir Santemedé na gran base naval del Atlánticu construyendo unos astilleros nel puertu. A partir d’Henrique IV el conceyu conviértese en realengu deslligándose del poder del abá. Isabel I concede a Burgos el monopoliu de los puertos del norte salvo Bilbáu, el resultáu foi que Sanander y los demás puertos asturianos perdieron la so independencia mercantil que xunto cola prohibición de comerciar con América privó al norte de tola bayura americana nuna desastrosa política que sigueron los Habsburgu, engafaos siempre en costoses guerres. Carlos I tenía previsto arribar a Castiella pel cai de Sanander pero un temporal arribólu a Tazones. La costera la sardina facíase con redes d’arrastre o traína en barques que por ello se nomen traineres. Georg Braun nel mapa de 1575 define a Sanander como “La ciudá situada nel mesmu país que Toloméu diz habitáu polos autrigones y que hoi llamen les Asturies de Santiyana”. Felipe II concede a la merindá d’Asturies de Santiyana el títulu de provincia un 2 de setiembre de 1630 lo que supón el triunfu de los conceyos que reclamaren cuantayá en pleitu contra los abusos de la nobleza feudal. Esti fechu supón que los conceyos y valles d’Asturies de Santiyana tienen derechu a facer una Xunta Xeneral pa resolver les custiones públiques. Esta Xunta va aconceyase en Bárcena de la Puente, a les afueres de Santiyana teniendo xurisdicción en tol territoriu históricu d’Asturies de Santiyana, al que pertenez la villa de Sanander. En 1660 Sanander aspira a ser sede episcopal “de peñes al mar” dixebrada de Burgos a lo que s’oponen tanto Burgos como la Colexata de Santiyana de la que dependía. Burgos yera la mayor diócesis del reinu. Por fin en 1754 Sanander algama obispáu propiu del ríu Deva al Nervión y de la divisoria d’agües hasta la mar. En 1765 Sanander y Xixón consiguen por fin el derechu a comerciar con América. En 1778 Asturies de Santiyana axúntase cola Llébana pa facer una provincia mayor. Y en 1785 créase en Sanander un Consuláu de Mar que yera tamién Tribunal de Comerciu. En 1801 Xixón y Sanander son designaes capitales de provincies marítimes con matrícules y banderes propies pa los sos barcos de colores blancu y vermeyu. En 1833 créase la nueva provincia de Santander, axuntando los territorios d’Asturies de Santiyana y Llébana col territoriu del correximientu de Laredu (Tresmiera y Vecio) amás de parte de Campoo qu’anteriormente pertenecía a la provincia de Palencia. En 1864 un grupu d’intelectuales lideraos por Gumersindo Laverde propugna la fusión de les provincies d’Uviéu y Santander nuna sola entidá superior baxo’l nome de Les Asturies.