Marcelino Menéndez Pelayo y Les dos Asturies

Marcelino Menéndez Pelayo y

Les dos Asturies

Marcelino Menéndez y Pelayo (Sanander 1856 – 1912) foi l’intelectual más reconocíu y afamáu de la provincia Sanander. La Universidá de Branu de Sanander lleva’l so nome. Básicamente foi un investigador de la lliteratura ya historia acurriáu nuna bayurosa etapa de rexeneracionismu cultural finisecular que contrasta cola mediocridá, escabildramientu, maturranga y abulia d’anguañu. Discípulu de Laverde, formó con él y con otros como Pereda, Amandi, Miranda, Escalante o Fernández de los Ríos un proyectu de base cultural y finalidá sociopolítica centráu alrodiu d’una revista: “La Tertulia, la Revista de Las dos Asturias”, col propósitu d’emponderar los intereses lliterarios de Les dos Asturies, los valores comuñegos y la cultura de les dos provincies asturianes: Uviéu y Sanander. Posteriormente pasáu un añu deciden cambia-y el nome a esta revista quincenal que pasa ser la “Revista Cantabroasturiana” p’aclariar duldes sobre cuálu yera l’ámbitu d’eses dos Asturies, pues ella mesma proclamábase herea d’otra revista de 1864, el “Almanaque de las dos Asturias”. En 1877 Menéndez Pelayo escribe un prólogu en nome de tola redacción xustificando’l cambiu de nome y que reproducimos arronte, un testu que conforma ún de los documentos más importantes na historia del asturianismu cultural y políticu de tolos tiempos:

“(…) En 1864 escomenzó a publicase un Almanaque de las dos Asturias, encamináu a estrechar los llazos entre dos provincies hermanes pol suelu, pola raza y poles costumes, y dividíes sólo por un criteriu oficial arbitrariu. Afayó ecu la idea entre montañeses y asturianos. La semiente quedó y hoi fructifica, La Tertulia decídese a cambiase de nome pol de Revista Cántabro-Asturiana. Evítase asina dalgún inconveniente que pudiera tener el de Revista de las dos Asturias, nel aspectu xeográficu. Sólo una parte, anque extrensa, del terrritoriu montañés llamóse Asturias de Santiyana, pero la fraternidá ente cántabros y ástures ye induldable y de tolos tiempos. Los accidentes físicos són comunes a les dos provincies: la mesma mar, la mesma cordalera. Hermanos los sos habitantes pola raza, pol primitivu celticismu, sonlo de mui antiguo poles costumes, dao qu’Estrabón afirmó que yera una la manera de vivir de ástures y cántabros. Únelos más y más la so historia. Xuntos resistieron a les lexones romanes, llamaes y favorecíes polos nuestros vecinos autrigones y bascos. Xuntos romanizáronse anque sólo en parte, perdiendo la so llingua pero non los usos nin la indomable altivez y espíritu d’independencia que los distingue d’ ente tolos pueblos peninsulares. Xuntos comenzaron la reconquista y cántabru o astur sería aquel Pelagio que los acaudillaba, non godu nin d’estirpe real como fantasearon vanos xenealoxistes. A la Monarquía asturiana pertenecíemos unos y otros, cuando cayó nos nuestros montes la palabra del gran controversista San Beatu de Llébana que nacíu ente dambes Asturies sirve de llazu d’unión a les dos provincies ximielgues. Cierto que tres la desmembración del reinu asturianu y nacimientu del condáu de Castiella, bona parte del pueblu montañés siguió les vicisitúes del nuevu estáu, alteriándose los sos límites con frecuencia. Pero que nun se perdieron por ésto les tradiciones d’hermandá indícalo claro el nome d’Asturias de Santiyana y el d’Asturias de Tresmiera. ¿Cómo olvidar que nes marines asturianes y montañeses aprestáronse les naves que concurrieron a la conquista de Sevilla? Fraternidá que nun s’interrumpe hasta nes sangrientes banderíes qu’asolaron l’últimu periodu de la Edá Media. Llegada ye la hora de restablecer l’antigua fraternidá ¿Y cuándo hubo otra más oportuna? Hoi, que por suerte rara, les dos provincies paecen tar en víes de prósperu adelantu y nun se resienten tanto como otres de la xeneral decadencia, quizá por conservar más puros los elementos tradicionales y el cultu a les sos vieyes y glorioses memories. Hoi que ye deber de concencia y d’amor patriu resistir a la centralización en toles sos esferes. Unámonos asturianos y montañeses y na xuntanza alcontraremos nueva fuerza. ¡Y quién sabe si enllazaes hasta oficialmente dambes provincies, rota la ilóxica división que a los montañeses nos lliga a Castiella, sin que seamos nin naide nos llame castiellanos, podrá la extensa y riquísima zona cántabroasturiana formar una entidá  unitaria y enérxica!. Trataremos con preferencia de cuanto pueda interesar a les provincies ximielgues. La so historia, tan poco explorada entovía, los estudios xeográficos y arqueolóxicos, les biografíes d’homes ilustres. Nin dexaremos d’estimular tou tipu d’empreses científiques y industriales útiles a Les Asturies. (…)”

XAVIEL VILAREYO

REVISTA FUSIÓN ASTURIAS 2013

Castiella, condáu d'Asturies

Castiella, condáu d’Asturies

L’orixe de Castiella ye un condáu del Reinu d’Asturies.  El reinu asturianu taba dividíu en condaos o provincies internes pa la so governanza. El cargu de conde nun yera hereditariu y tenía funciones alministratives, fiscales, xudiciales y militares amás de representar al rei al que debía rendir cuentes añalmente. El rei podía destituir a los condes si bien nel condáu de Galicia surdieron tendencies a heredar el cargu políticu. El condáu más oriental yera’l d’Álaba que comprendía cuasi les actuales Bizcaya y Álaba. Llindante taba’l pequenu condáu de Castiella siendo éstos nel sieglu IX los más difíciles d´habitar polos ataques moros que subíen dende Zaragoza.

La primer mención oficial a Castiella apaez na Crónica d’Alfonsu III escrita n’Uviéu nel 883 onde se diz qu’Alfonsu I pobló y organizó les tierres de Bardulia qu’agora llamamos “Castella”. Esti territoriu ye’l situáu al norte del ríu Ebru y al sur de los montes onde los reis d’Asturies edificaron abondos castiellos defensivos que daríen nome al condáu.

Esta tierra na antiguedá yera Autrigonia, habitada por un pueblu celta, los autrigones, mui romanizaos y que pudo recibir población de bárdulos, tamién recibió a colonos bascos, asturianos y godos. Esta Castiella Vieya comprende los valles de Mena, Losa, Valdegovía y norte de La Bureba. De tiempos d’Alfonsu II daten les colonizaciones eclesiástiques de los abaes Vítulo y Ervigiu en Villarcayo. Los colonos del norte ocupaben les tierres por simple presura. Los obispos asturianos Odoariu y Xuan colonicen Luego y Valpuesta. L’obispáu de Valpuesta consolídase a pesar de los ataques moros siendo’l gran obispáu oriental del Reinu d’Asturies.

Nel 865 datamos la esistencia del conde Rodrigu, el primer conde conocíu de Castiella que tamién lo yera d’Álaba. El conde Gómez governaba Amaya; Ordoñu, el condáu d’Oca y Gonzalo el del castiellu de Burgos. Yá con Rodrigu, fiel servidor d’Ordoñu I d’Asturies, el so condáu espándese pal sur del Ebru pelos sos afluentes. Con Alfonsu III el reinu estiéndese per tola Bureba y llega hasta Pancorbu y los condaos orientales ganen abondu terrén y más responsabilidaes militares. Nel 884 el conde Diego Rodríguez Porcelos, fíu de Rodrigu, recibe l’encargu de poblar Burgos y la frontera del Reinu d’Asturies llega hasta’l ríu Arlanza. A principios del sieglu X la frontera yá ta nel Dueru. Gonzalo Téllez apaez como conde de Lantarón y Cerezu, Nuño Núñez en “Castiella” y Gonzalo Fernández en Lara y Burgos. Alfonsu III yera contrariu a unificar toos estos condaos orientales mui activos militarmente pero hacia 932 Fernán González, conde de Lara y Burgos, fíu del anterior conde, llogra axuntar na so persona los condaos de Lantarón, Cerezu y Álaba, nomándose-y conde en “toa Castiella”. Fernán González presionó pa qu’esti condáu fuera hereditariu, una tendencia del nuevu feudalismu, anque nunca se separtó de la obediencia y sumisión debida a los reis lexítimos d’Asturies. Los problemes sucesorios nel reinu favorecieron la nueva moda hereditaria, sofitada nos precedentes de Galicia y na concesión del cargu condal a los príncipes asturianos, fíos del rei. El debilitamientu del poder real facilita a los condes a exercer funciones “reales” como conceder fueros o tomar decisiones militares propies y rápides (conquistes). Defender la frontera implicaba necesariamente conquistar nuevos territorios, espandiendo asina los condaos asturianos hacia’l sureste. Muertu’l fíu de Fernán González nun asediu hereda’l cargu condal el so hermanu Sanchu García que tuvo que pagar tributu añal a Almanzor. Que’l cargu fuera hereditariu nun significa  una “independencia” como afirmen los historiadores castiellanistes. Nada más lloñe de la realidá. El rei tenía’l so exércitu y poder lexítimu y si lo quería imponer pola fuerza tenía derechu a facelo axusticiando a cualuquier conde, pero na práctica nun había más soberanía que la del rei y más enemigu que los moros, y toos lluchaben nuna mesma empresa común. El reinu asturianu sólo se “dixebra” cuando Alfonsu III lu reparte ente los fíos a la manera xermánica tornando a xuntase con Fruela II d’Asturies y con Alfonsu VI. La llingua d’esti territoriu de Castiella, un romance asturianu influenciáu pola fonética bascuencia, empieza a diferenciase. El condáu pasa por herencia al rei de Pamplona y llueu al segundu de los sos fíos, Fernando que casáu cola heredera del Reinu d’Asturies, Sancha, conviértese en Fernando I, rei consorte d’Asturies y Lleón y conde de Castiella. La invención de Castiella como “reinu” ye una creación más bien del sieglu XIII inspirada poles ambiciones imperiales d’Alfonsu X llueu les conquistes de Toledo y Andalucía.

Xaviel Vilareyo

xavielvilareyo@hotmail.com